ਈਪਰ, ਬੈਲਜ਼ੀਅਮ ( ਪ੍ਰਗਟ ਸਿੰਘ ਜੋਧਪੁਰੀ ) ਪਿਛਲੇ ਦਿਨੀ ਤੁਰਕੀ ਦੀ ਰਾਜਧਾਨੀ ਇਸਤਮਬੁਲ ਵਿੱਚ ਹੋਏ ਕਰਾਟੇ ਵਿਸ਼ਵ ਕੱਪ ਵਿੱਚ ਜਰਮਨ ਟੀਮ ਨੂੰ ਤੀਸਰਾ ਸਥਾਨ ਪ੍ਰਾਪਤ ਹੋਇਆ। ਇਸ ਤੀਸਰੇ ਸਥਾਨ ਅਤੇ ਕਾਂਸੀ ਦੇ ਤਗਮੇ ਲਈ ਪੰਜਾਬੀ ਮੂਲ ਦੇ ਜਰਮਨ ਖਿਡਾਰੀ ਅਮ੍ਰਿਤ ਕਾਹਲੋਂ ਦੀ ਭਾਰੀ ਦੇਣ ਹੈ ਜਿਸ ਨੇ ਵਿਸ਼ਵ ਪੱਧਰ ਦੇ ਖਿਡਾਰੀਆਂ ਨੂੰ ਸਖ਼ਤ ਟੱਕਰ ਦਿੱਤੀ। 23 'ਤੋਂ 27 ਮਾਰਚ ਨੂੰ ਹੋਏ ਕਰਾਟੇ ਵਿਸ਼ਵ ਕੱਪ ਵਿੱਚ ਅਮ੍ਰਿਤ ਨੇ ਸਾਂਨਦਾਰ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ ਆਸਟਰੇਲੀਆ ਨੂੰ 1-2 ਨਾਲ, ਸਰਬੀਆ ਨੂੰ 1-3 ਨਾਲ, ਨਿਊਜੀਲੈਂਡ ਨੂੰ 0-1 ਨਾਲ, ਇੰਗਲੈਂਡ ਨੂੰ 1-2 ਨਾਲ ਅਤੇ ਫਰਾਂਸ ਦੇ ਵਿਸ਼ਵ ਕੱਪ ਜੇਤੂ ਨੂੰ 2-2 ਦੀ ਬਰਾਬਰੀ 'ਤੇ ਰੋਕਿਆ। ਇਸ ਟੂਰਨਾਮੈਂਟ ਵਿੱਚ ਇੱਕ ਖਾਸੀਅਤ ਇਹ ਰਹੀ ਕਿ ਅਮ੍ਰਿਤ ਸਭ Ḕਤੋਂ ਘੱਟ ਉਮਰ ਦਾ ਖਿਡਾਰੀ ਹੋਣ ਦੇ ਬਾਵਜੂਦ ਇੱਕ ਵੀ ਮੈਚ ਨਹੀ ਹਾਰਿਆ। ਜਰਮਨ ਕੋਚ ਨੇ ਅਮ੍ਰਿਤ ਦੀ ਇਸ ਪ੍ਰਾਪਤੀ ਨੂੰ ਇਤਿਹਾਸਿਕ ਕਰਾਰ ਦਿੰਦੇਂ ਹੋਏ ਕਿਹਾ ਕਿ ਐਨੀ ਘੱਟ ਉਮਰ ਵਿੱਚ ਸਾਨਾਂ ਦੇ ਭੇੜ ਵਿੱਚ ਭਿੜਕੇ ਸਾਰੀਆਂ ਫਾਈਟਾਂ ਜਿੱਤਣੀਆਂ ਬਹੁਤ ਹੀ ਮਾਣ ਵਾਲੀ ਗੱਲ ਹੈ ਜਿਸਨੇ 110 ਕਿਲੋ 'ਤੋਂ ਉਪਰ ਦੇ ਯੂਰਪੀਨ ਅਤੇ ਵਿਸ਼ਵ ਚੈਂਪੀਅਨਾਂ ਨੂੰ ਸਖਤ ਟੱਕਰ ਦੇ ਮਿਸਾਲ ਕਾਇਮ ਕੀਤੀ। 2-2 ਦੀ ਬਰਾਬਰੀ 'ਤੇ ਰਹਿਣ ਬਾਅਦ ਫਰਾਂਸ ਦੇ ਅਫਰੀਕਾ ਮੂਲ ਦੇ ਵਿਸ਼ਵ ਜੇਤੂ ਖਿਡਾਰੀ ਨੇ ਅਮ੍ਰਿਤ ਨੂੰ ਬੁੱਕਲ ਵਿੱਚ ਲੈਦਿਆਂ ਚੰਗੇਂ ਭਵਿੱਖ ਲਈ ਸੁਭ ਕਾਮਨਾਵਾਂ ਦਿੱਤੀਆਂ।
ਅਮ੍ਰਿਤ ਦੇ ਪਿਤਾ ਤਰਲੋਚਨ ਸਿੰਘ ਕਾਹਲੋਂ ਨੇ ਪ੍ਰੈਸ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਅਮ੍ਰਿਤ ਜਰਮਨੀ ਟੀਮ ਵੱਲੋਂ ਖੇਡਣ ਵਾਲਾ ਪਹਿਲਾ ਪੰਜਾਬੀ ਖਿਡਾਰੀ ਹੈ। ਅਮ੍ਰਿਤ ਕਾਹਲੋਂ ਦੀ ਇਸ ਇਤਿਹਾਸਿਕ ਪ੍ਰਾਪਤੀ 'ਤੇ ਕਾਹਲੋਂ ਪਰਿਵਾਰ ਨੂੰ ਵਧਾਈਆਂ ਦੇਣ ਵਾਲਿਆਂ ਵਿੱਚ ਨਿਊਜੀਲੈਂਡ 'ਤੋਂ ਸਰਦਾਰ ਨਵਤੇਜ ਸਿੰਘ ਰੰਧਾਵਾ, ਕਨੇਡਾ, ਅਮਰੀਕਾ ਅਤੇ ਯੋਰਪ ਦੀਆਂ ਖੇਡ ਸੰਸਥਾਵਾਂ ਅਤੇ ਮਿੱਤਰ-ਦੋਸਤ ਸਾਮਲ ਹਨ।
ਅਮ੍ਰਿਤ ਦਾ ਨਾਨਕਾ ਪਿੰਡ ਰੰਧਾਵਾ ਮਸੰਦਾ ਅਤੇ ਕਾਹਲੋਂ ਪਰਿਵਾਰ ਦੇ ਜੱਦੀ ਪਿੰਡ ਕਾਹਲਵਾਂ, ਕਰਤਾਰਪੁਰ ਦੇ ਵਾਸੀ ਖੁਸ਼ੀਆਂ ਮਨਾ ਰਹੇ ਹਨ। ਜਿਕਰਯੋਗ ਹੈ ਕਿ ਅਮ੍ਰਿਤ ਦੀ ਇਸ ਖੇਡ ਨੂੰ ਦੇਖਣ ਅਤੇ ਹੌਸਲਾ ਅਫਜਾਈ ਲਈ ਜਰਮਨ ਵਸਦੇ ਤੁਰਕੀ ਭਾਈਚਾਰੇ ਦੇ ਬਹੁਤ ਸਾਰੇ ਮੁੰਡੇ-ਕੁੜੀਆਂ ਨੇ ਤੁਰਕੀ ਜਾ ਕੇ ਟੂਰਨਾਮੈਂਟ ਦਾ ਅਨੰਦ ਮਾਣਿਆ।