ਈਪਰ, ਬੈਲਜ਼ੀਅਮ ( ਪ੍ਰਗਟ ਸਿੰਘ ਜੋਧਪੁਰੀ ) ਜਨਵਰੀ 2014 ਵਿੱਚ ਭਾਰਤੀ ਦੂਤਘਰ ਬਰੱਸਲਜ਼ ਵਿੱਚ ਅਪਣਾ ਭਾਰਤੀ ਪਾਸਪੋਰਟ ਨਵਿਆਉਣ ਦੀ ਅਰਜੀ ਦੇਣ ਬਾਅਦ ਬੈਲਜ਼ੀਅਮ ਰਹਿੰਦਾ ਪੰਜਾਬੀ ਅਮਰਜੀਤ ਸਿੰਘ ਕਈ ਮਹੀਨੇ ਖੁਆਰ ਹੁੰਦਾ ਰਿਹਾ। ਲਾਰੇ-ਲੱਪਿਆਂ 'ਤੋ ਨਿਰਾਸ਼ ਅਮਰਜੀਤ ਸਿੰਘ ਨੇ ਆਂਮ ਆਦਮੀ ਪਾਰਟੀ ਦੇ ਚਰਚਿਤ ਆਗੂ ਅਤੇ ਸਾਂਸਦ ਭਗਵੰਤ ਮਾਂਨ ਨਾਲ ਸੰਪਰਕ ਕੀਤਾ ਤਾਂ ਉਹਨਾਂ ਦੇ ਪੀ ਏ ਨੇ ਸੰਗਰੂਰ ਦਫਤਰ ਵਿਖੇ ਸਾਰਾ ਮਾਮਲਾ ਲਿਖਤੀ ਰੂਪ ਵਿੱਚ ਭੇਜਣ ਲਈ ਕਿਹਾ। ਜਦ ਸਾਰਾ ਕੁੱਝ ਲਿਖਤੀ ਰੂਪ ਵਿੱਚ ਭੇਜਿਆਂ ਤਾਂ ਉਹਨਾਂ ਨੇ ਲੀਡਰਾਂ ਵਾਲਾ ਲਾਰਾ ਲਗਾਉਦਿਆਂ ਖੁਦ ਹੀ ਵਿਦੇਸ਼ ਮੰਤਰਾਲੇ ਨੂੰ ਖਤ ਲਿਖਣ ਦੀ ਸਲਾਹ ਦੇ ਕੇ ਸਾਰ ਦਿੱਤਾ।
ਫਿਰ ਪੀੜਤ ਵੱਲੋਂ ਪਟਿਆਲਾ 'ਤੋਂ ਲੋਕ ਸਭਾ ਮੈਂਬਰ ਡਾਕਟਰ ਧਰਮਵੀਰ ਗਾਂਧੀ ਨਾਲ ਸੰਪਰਕ ਕੀਤਾ ਜਿਨ੍ਹਾਂ ਨੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਭਾਰਤ ਦੀ ਵਿਦੇਸ ਮੰਤਰੀ ਸੁਸਮਾ ਸਵਰਾਜ ਨੂੰ ਪੱਤਰ ਲਿਖ ਕੇ ਦਖਲ ਦੀ ਮੰਗ ਕੀਤੀ। ਡਾਕਟਰ ਗਾਂਧੀ ਦੇ ਪੱਤਰ ਦਾ ਜਵਾਬ ਦਿੰਦਿਆਂ ਭਾਰਤੀ ਵਿਦੇਸ਼ ਮੰਤਰੀ ਨੇ ਇਸ ਮਸਲੇ ਨੂੰ ਜਲਦੀ ਹੱਲ ਕਰਨ ਦਾ ਭਰੋਸਾ ਦਿੱਤਾ ਅਤੇ ਭਾਰਤੀ ਦੂਤਘਰ ਨੂੰ ਇਸ ਦੇਰੀ ਦੇ ਕਾਰਨ ਬਾਰੇ ਪੁੱਛਿਆ। ਭਾਰਤੀ ਵਿਦੇਸ਼ ਮੰਤਰੀ ਦੇ ਦਖਲ 'ਤੋਂ ਬਾਅਦ 13 ਮਹੀਨਿਆਂ ਬਾਅਦ ਅਮਰਜੀਤ ਸਿੰਘ ਸੰਗੜ ਭਾਰਤੀ ਪਾਸਪੋਰਟ ਰੀਨੀਊ ਕਰਵਾਉਣ ਵਿੱਚ ਸਫਲ ਹੋ ਸਕਿਆ। ਡਾਕਟਰ ਧਰਮਵੀਰ ਗਾਂਧੀ ਵੱਲੋਂ ਅਪਣੇ ਹਲਕੇ ਦੇ ਲੋਕਾਂ ਦੀਆਂ ਸਮੱਸਿਆਵਾਂ ਅਤੇ ਪ੍ਰਵਾਸੀਆਂ ਦੇ ਮਸਲਿਆਂ ਨੂੰ ਨਜਿੱਠਣ ਲਈ ਕੀਤੀ ਜਾ ਰਹੀ ਪਹਿਲਕਦਮੀ ਦੀ ਪੰਜਾਬੀ ਭਾਈਚਾਰੇ ਵੱਲੋਂ ਭਾਰੀ ਸਲਾਘਾ ਹੋ ਰਹੀ ਹੈ ਅਤੇ ਲੋਕਾਂ ਵਿੱਚ ਚਰਚਾ ਹੈ ਕਿ ਅਸਲ ਵਿੱਚ ਆਂਮ ਆਦਮੀ ਦੀ ਪਹੁੰਚ ਵਾਲੇ ਇੱਕੋ-ਇੱਕ ਆਗੂ ਡਾ ਧਰਮਵੀਰ ਗਾਂਧੀ ਹੀ ਹਨ। ਅਮਰਜੀਤ ਸਿੰਘ ਨੇ ਪਟਿਆਲਾ ਹਲਕੇ ਦੇ ਵੋਟਰਾਂ ਦਾ ਧੰਨਵਾਦ ਕੀਤਾ ਹੈ ਜਿਨ੍ਹਾਂ ਨੇ ਅਸਲੀ ਲੋਕ ਹਮਦਰਦ ਬੰਦੇਂ ਨੂੰ ਵੋਟਾਂ ਪਾ ਕੇ ਲੋਕ ਸਭਾ ਵਿੱਚ ਭੇਜਿਆ ਹੈ।
