ਅੱਜ ਤੋਂ ਕਾਫ਼ੀ ਵਰ੍ਹੇ ਪਹਿਲਾਂ ਗਾਇਕ ਮਨਮੋਹਣ ਵਾਰਿਸ ਦੇ ਗੀਤ 'ਪੰਜਾਬੀ ਸ਼ੇਰਾ' ਵਿੱਚ ਬਤੌਰ ਮਾਡਲ
ਅਦਾਕਾਰੀ ਕਰਨ ਵਾਲਾ ਲੰਮ-ਸਲੰਮਾ ਗੱਭਰੂ ਗੋਲਡੀ ਸੂਮਲ ਅਜੇ ਵੀ ਸਭ ਦੇ ਚੇਤਿਆਂ ਵਿੱਚ ਬੀਤੇ ਕੱਲ੍ਹ ਦੀ ਤਰ੍ਹਾਂ ਹੀ ਤਾਜ਼ਾ ਹੈ। ਇਸ ਤਾਜ਼ਗੀ ਦੀ ਵਜ੍ਹਾ ਇਹ ਹੈ ਕਿ ਉਸਨੇ ਆਪਣੇ ਉਸ ਪਹਿਲੇ ਵੀਡੀਓ ਰਾਹੀਂ ਹੀ ਇਹ ਦਰਸਾ ਦਿੱਤਾ ਸੀ ਕਿ ਉਸ ਵਿੱਚ ਅੱਗੇ ਵਧਣ ਦੇ ਯੋਗਤਾ ਹੈ ਤੇ ਇਸੇ ਦੇ ਬਲਬੂਤੇ 'ਤੇ ਉਸਨੇ ਲਗਭਗ 75 ਕੁ ਦੇ ਕਰੀਬ ਪੰਜਾਬੀ ਵੀਡੀਓਜ਼ ਵਿੱਚ ਕੰਮ ਕੀਤਾ। ਉਸਦੀ ਡੀਲ-ਡੌਲ ਅਤੇ ਪ੍ਰਪੱਕ ਅਦਾਕਾਰੀ ਨੂੰ ਦੇਖ ਕੇ ਹੀ ਉੱਘੇ ਫ਼ਿਲਮਸਾਜ਼ ਇਕਬਾਲ ਢਿੱਲੋਂ ਨੇ ਉਸਨੂੰ ਆਪਣੀ ਫ਼ਿਲਮ 'ਮਹਿੰਦੀ ਵਾਲੇ ਹੱਥ' ਵਿੱਚ ਬਤੌਰ ਹੀਰੋ ਲੈਣ ਦਾ ਜੂਆ ਖੇਡਿਆ ਸੀ। ਉਸ ਫ਼ਿਲਮ ਨੂੰ ਮਿਲੀ ਸਫ਼ਲਤਾ ਨੇ ਉਸ ਲਈ ਪਾਲੀਵੁੱਡ ਦਾ ਰਸਤਾ ਖੋਲ੍ਹ ਦਿੱਤਾ ਪਰ ਬਦਕਿਸਮਤੀ ਨਾਲ ਉਹਨੀਂ ਦਿਨੀਂ ਹੀ ਉਸਨੂੰ ਬੀਮਾਰੀ ਨੇ ਘੇਰਾ ਪਾ ਲਿਆ। ਲਗਭਗ ਚਾਰ-ਪੰਜ ਵਰ੍ਹੇ ਬੀਮਾਰੀ ਨਾਲ ਲੜਣ ਤੋਂ ਬਾਅਦ ਉਸਨੇ ਫਿਰ ਆਪਣੇ ਆਪ ਨੂੰ ਇਕੱਠਾ ਕੀਤਾ ਅਤੇ ਮੁੜ ਮੁੰਬਈ ਜਾ ਕੇ ਇਸ ਖੇਤਰ 'ਚ ਸੰਘਰਸ਼ ਕਰਨਾ ਸ਼ੁਰੂ ਕਰ ਦਿੱਤਾ। ਇਸੇ ਸਮੇਂ ਦੌਰਾਨ ਹੀ ਨਿਰਮਾਤਾ ਇਕਬਾਲ ਢਿੱਲੋਂ ਨੇ ਚਰਚਿਤ ਗਾਇਕਾ ਮਿਸ ਪੂਜਾ ਨੂੰ ਲੈ ਕੇ ਜਦ 'ਚੰਨਾਂ ਸੱਚੀਂ ਮੁੱਚੀਂ' ਫ਼ਿਲਮ ਬਣਾਉਣ ਦੀ ਸੋਚੀ ਤਾਂ ਉਸਦੇ ਦਿਮਾਗ ਵਿੱਚ ਪੂਜਾ ਨਾਲ ਹੀਰੋ ਵਜੋਂ ਸਿਰਫ਼ ਗੋਲਡੀ ਦਾ ਨਾਂ ਹੀ ਆਇਆ । ਸੋ ਇਸ ਤਰਾਂ ਇਸ ਫ਼ਿਲਮ ਨਾਲ ਇੱਕ ਵਾਰ ਫਿਰ ਪੰਜ ਵਰ੍ਹਿਆਂ ਬਾਅਦ ਗੋਲਡੀ ਦੀ ਸਿਨੇਮਾ ਸਕਰੀਨ 'ਤੇ ਵਾਪਸੀ ਹੋਣ ਜਾ ਰਹੀ ਹੈ। ਇਸ ਫ਼ਿਲਮ ਨੂੰ ਲੈ ਕੇ ਇਹਨੀਂ ਦਿਨੀਂ ਉਹ ਬਹੁਤ ਖੁਸ਼ ਅਤੇ ਉਤਸ਼ਾਹਿਤ ਨਜ਼ਰ ਆ ਰਿਹਾ ਹੈ। ਪਾਠਕ ਇਹ ਗੱਲ ਪੜ੍ਹ ਕੇ ਹੈਰਾਨ ਹੋਣਗੇ ਕਿ ਇਸ ਫ਼ਿਲਮ ਲਈ ਬੀਮਾਰੀ ਤੋਂ ਬਾਅਦ ਗੋਲਡੀ ਨੇ 35 ਕਿੱਲੋ ਵਜ਼ਨ ਘਟਾਇਆ ਹੈ।ਹੁਸ਼ਿਆਰਪੁਰ ਜ਼ਿਲ੍ਹੇ ਦੇ ਪਿੰਡ ਭੱਕਲਾਂ ਦੇ ਜੰਮਪਲ ਅਤੇ ਮਾਡਲਿੰਗ ਰਾਹੀਂ ਪਹਿਲਾਂ ਵੀਡੀਓਜ਼ ਅਤੇ ਫਿਰ ਫ਼ਿਲਮਾਂ ਵਿੱਚ ਆਏ ਗੋਲਡੀ ਨੇ ਇਸ ਫ਼ਿਲਮ ਵਿੱਚ ਇੱਕ ਅਜਿਹੇ ਕਾਲਜੀਏਟ ਮੁੰਡੇ ਦੀ ਭੂਮਿਕਾ ਨਿਭਾਈ ਹੈ ਜੋ ਆਪਣੇ ਪਿਆਰ ਦੀ ਪ੍ਰਾਪਤੀ ਲਈ ਸਭ ਨਾਲ ਜੰਗ ਲੜਦਾ ਹੈ। ਗੋਲਡੀ ਦਾ ਅਕਸ ਇੱਕ ਐਕਸ਼ਨ ਹੀਰੋ ਵਾਲਾ ਹੋਣ ਕਾਰਨ ਰੁਮਾਂਸ ਦੇ ਨਾਲ-ਨਾਲ ਉਸ ਦੇ ਹਿੱਸੇ ਕਾਫ਼ੀ ਲੜਾਈ ਵਾਲੇ ਦ੍ਰਿਸ਼ ਵੀ ਆਏ ਹਨ। ਉਸ ਅਨੁਸਾਰ ਜੇਕਰ ਫ਼ਿਲਮ ਦੀ ਕਹਾਣੀ ਵਧੀਆ ਹੋਵੇ ਅਤੇ ਉਸ ਕਹਾਣੀ ਦੇ ਅਨੁਸਾਰ ਹੀ ਪਾਤਰਾਂ ਦੀ ਚੋਣ ਕੀਤੀ ਜਾਵੇ ਤਾਂ ਨਿਸ਼ਚੇ ਹੀ ਫ਼ਿਲਮ ਸਫ਼ਲਤਾ ਪ੍ਰਾਪਤ ਕਰਦੀ ਹੈ। ਇਸ ਲਈ ਉਹ ਨਿਰਮਾਤਾ ਇਕਬਾਲ ਢਿੱਲੋਂ, ਸਹਿ-ਨਿਰਮਾਤਾ ਚਿੰਟੂ ਢਿੱਲੋਂ ਅਤੇ ਨਿਰਦੇਸ਼ਕ ਹਰਿੰਦਰ ਗਿੱਲ ਦਾ ਧੰਨਵਾਦੀ ਹੈ ਜਿੰਨ੍ਹਾਂ ਨੇ ਉਸ ਉੱਪਰ ਭਰੋਸਾ ਪ੍ਰਗਟਾਉਂਦਿਆਂ ਦੁਬਾਰਾ ਉਸ ਨੂੰ ਆਪਣੀ ਫ਼ਿਲਮ ਵਿੱਚ ਆਪਣੀ ਯੋਗਤਾ ਦਿਖਾਉਣ ਦਾ ਮੌਕਾ ਦਿੱਤਾ ਹੈ। ਉਸ ਅਨੁਸਾਰ ਇਹ ਫ਼ਿਲਮ ਸਚਮੁੱਚ ਹੀ ਉਸਦੇ ਦਿਲ ਦੇ ਬਹੁਤ ਕਰੀਬ ਹੈ ਅਤੇ ਇਸ ਵਿੱਚ ਕੰਮ ਕਰ ਕੇ ਉਸ ਨੂੰ ਬਹੁਤ ਆਨੰਦ ਆਇਆ ਹੈ। ਉਹ ਦਾਅਵੇ ਨਾਲ ਕਹਿੰਦਾ ਹੈ ਕਿ ਇਸ ਫ਼ਿਲਮ ਨੂੰ ਦੇਖ ਕੇ ਕੋਈ ਵੀ ਦਰਸ਼ਕ ਨਿਰਾਸ਼ ਨਹੀਂ ਜਾਵੇਗਾ ਹਰੇਕ ਵਰਗ ਦਾ ਦਰਸ਼ਕ ਇਸ ਫ਼ਿਲਮ ਨਾਲ ਆਪਣੇ ਆਪ ਨੂੰ ਜੁੜਿਆ ਮਹਿਸੂਸ ਕਰੇਗਾ। 20 ਅਗਸਤ ਨੂੰ ਰਿਲੀਜ਼ ਹੋਣ ਜਾ ਰਹੀ ਇਸ ਫ਼ਿਲਮ ਵਿੱਚ ਉਸ ਨਾਲ ਮਿਸ ਪੂਜਾ ਤੋਂ ਇਲਾਵਾ ਜਸ ਢਿੱਲੋਂ, ਕਰਤਾਰ ਚੀਮਾ, ਰਾਣਾ ਰਣਵੀਰ, ਅਨੀਤਾ ਸ਼ਬਦੀਸ਼, ਪਾਲੀ ਮਾਂਗਟ ਅਤੇ ਰਾਜ ਵਿਰਕ ਨੇ ਵੀ ਅਹਿਮ ਭੂਮਿਕਾਵਾਂ ਨਿਭਾਈਆਂ ਹਨ। ਉਮੀਦ ਹੈ ਗੋਲਡੀ ਦੀ ਪਿਛਲੀ ਰਿਲੀਜ਼ ਹੋਈ ਫ਼ਿਲਮ 'ਮਹਿੰਦੀ ਵਾਲੇ ਹੱਥ' ਵਾਂਗ ਇਹ ਫ਼ਿਲਮ ਵੀ ਉਸ ਲਈ ਸਫ਼ਲਤਾ ਦਾ ਸਬੱਬ ਬਣੇਗੀ ।
ਹਰਿੰਦਰ ਭੁੱਲਰ ਫ਼ਿਰੋਜ਼ਪੁਰ
ਮੋਬਾਇਲ-9464008008
ਈ-ਮੇਲ-harinderbhullar420@yahoo.com